சத்தியமாய் எதுவும் தோன்றாது

கன்னியவள் காலடியில்
முத்தமிடத் தோன்றும்
விண்ணிலவோ அவள் முகத்தில்
வியர்வையாகத் தோன்றும்

மின்னலினால் அவள் விழியில்
சிக்கி விடத் தோன்றும்
பின்னலான கூந்தளிருளில்
தொலைந்து விடத் தோன்றும்

தென்றலாகி அவள் உடலை
தீண்டி விடத் தோன்றும்
மன்றாடி அவள் நெஞ்சம்
தஞ்சம் புகத் தோன்றும்

கொவ்வைப் பழ இதழைக் கொஞ்சம்
கௌவ்வி விடத் தோன்றும்
செம்மைக் கவி மொழியை
பாடலாக்கத் தோன்றும்

நடக்கையிலே  பாதத்தடி
மணலாகத் தோன்றும்
சிரிக்கையிலே புன்னகையின்
இசையாகத் தோன்றும்

சீக்கிரமாய் அவள் பார்வை
சித்தமெனத் தோன்றும்
சித்திரையில் அவள் வந்தால்
வசந்தமெனத் தோன்றும்

அவள் ஆடைக்குள் அரை நொடிகள்
செத்து விடத் தோன்றும்
ஆசை கொண்டு அவளில் என்னை
ஒளித்து விடத் தோன்றும்

கோபத்தில் அவள் திட்டும்  போதும்
பாசத்துடன்  அவள் எனைப் பார்க்கும் போதும்
சத்தியமாய் என் நெஞ்சில்
எதுவும் தோன்றாது